« ღარიბაშვილი: ჩვენი ხელისუფლების პირობებში ვერავინ გაბედავს დესტაბილიზაციის მოწყობას »

ავტორი: admin

თარიღი: 2014-04-09 00:32:31

საქართველოს პრემიერმინისტრი ირაკლი ღარიბაშვილი შს მინისტრის ალექსანდრე ჭიკაიძის განცხადებას შესაძლო დესტაბილიზაციასთან დაკავშირებით, გამოეხმაურა.

როგორც ღარიბაშვილმა ჟურნალისტებთან საუბრისას აღნიშნა, ჭიკაიძემ ისაუბრა დესტაბილიზაციის შესაძლო საფრთხეზე, თუმცა განგაშის საფუძველი არ არსებობს.

„მინდა ყველა დავარწმუნო და დავამშვიდო, ჩვენი ხელისუფლების პირობებში ვერავინ გაბედავს დესტაბილიზაციის მოწყობას და თუ ვინმეს ექნება მსგავსი მცდელობა ან სურვილი, ვინც არ უნდა იყოს იგი, უმკაცრესად დაისჯება. შინაგან საქმეთა მინისტრმა ისაუბრა შესაძლო საფრთხეებსა და იმ სურვილებზე, რომელიც შესაძლოა, რომელიმე არანორმალურ ადამიანს ჰქონდეს. საგანგაშო არაფერია“, - აღნიშნა ირაკლი ღარიბაშვილმა.

ალექსანდრე ჭიკაიძემ „პრაიმ ტაიმთან“ ექსკლუზიურ ინტერვიუში განაცხადა, რომ „ნაციონალური მოძრაობა“ ევრომაიდნის სცენარს ამუშავებს და ამ მიზნით, საბურავების მომარაგება დაწყებულია.