EVPATORI Web Resources
გამოკითხვა
მოგწონთ ნოველები - ჩვენი საქმე
დარეგისტრირებული მომხმარებლები
Luka777
იყოდაარაიყორა
Robtrim
FrankyJ
ჯონი
« წყევლა, რომელმაც სტრასბურგი ააცეკვა »
კატეგორია: უცნაურიავტორი: admin
თარიღი: 2026-06-04 15:04:38
1518 წლის ცხელ ივლისის დილას, სტრასბურგის ვიწრო და მტვრიან ქუჩაში, ფრაუ ტროფეა სახლიდან გამოვიდა. მის სახეზე არც ღიმილი იყო და არც სიხარული, თუმცა მოულოდნელად მისი სხეული უცნაურად აკანკალდა. ქალმა ხელები ჰაერში ასწია და გაუჩერებლად, თავგამოდებით ცეკვა დაიწყო. ირგვლივ არანაირი მუსიკა არ ისმოდა, მხოლოდ მისი ფეხების ხმაური აყრუებდა არემარეს.გამვლელები გაოცებულები უყურებდნენ, ეგონათ ხუმრობდა. თუმცა გავიდა საათები, დაღამდა, მზე ისევ ამოვიდა, ტროფეა კი კვლავ ცეკვავდა. მისი ფეხებიდან უკვე სისხლი ჟონავდა, კაბა მტვრითა და ოფლით ჰქონდა დასვრილი, თვალები კი შიშითა და გაურკვევლობით ჰქონდა სავსე, თითქოს საკუთარ სხეულს ვეღარ მართავდა. რამდენიმე დღეში მას კიდევ ოცდაათამდე ადამიანი შეუერთდა. ისინი ერთმანეთს არც კი უყურებდნენ, უბრალოდ ტრანსში მყოფები, შეპყრობილებივით მოძრაობდნენ.ქალაქში პანიკამ დაისადგურა. შეშინებულმა ხელისუფლებამ ექიმებსა და ასტროლოგებს უხმო. მათ პაციენტები გასინჯეს და უცნაური დიაგნოზი დასვეს: „ცხელი სისხლი“. განკურნების წამლად კი... კიდევ უფრო მეტი ცეკვა გამოუწერეს. ქალაქის მესვეურებმა დიდ მოედანზე ხის სცენა ააგეს, პროფესიონალი მუსიკოსები დაიქირავეს და ძლიერი მამაკაცებიც კი მიუჩინეს მოცეკვავეებს, რათა დაცემისას ხელი შეეშველებინათ.ეს საბედისწერო შეცდომა აღმოჩნდა. აგვისტოსთვის მოედანზე უკვე 400-ზე მეტი ადამიანი მზის გულზე, სიცხეში, გაუჩერებლად ბორგავდა. მუსიკის რიტმი და ხალხის ყვირილი ნამდვილ ჯოჯოხეთურ სანახაობად იქცა. მალე ფიზიკურმა გადაღლილობამ თავისი გაიტანა. ადამიანებმა სათითაოდ დაიწყეს ძირს დაცემა — ზოგს გულმა უმტყუნა, ზოგს ინსულტმა მოუღო ბოლო. დღეში 15-მდე ადამიანი კვდებოდა პირდაპირ სცენაზე, მაგრამ სხვები მათ გვამებს გვერდს უვლიდნენ და ცეკვას მაინც აგრძელებდნენ.
შემოდგომის დადგომასთან ერთად, ეს მისტიკური მანია ისევე მოულოდნელად გაქრა, როგორც დაიწყო. სტრასბურგმა ღრმად ამოისუნთქა, თუმცა ქალაქის ქუჩებში კიდევ დიდხანს დარჩა იმ საშინელი, ჩუმი მუსიკის ექო, რომელმაც ასობით ადამიანი სიკვდილამდე აცეკვა.
XVI საუკუნის ექიმები ეყრდნობოდნენ ძველ ბერძნულ ჰუმორალურ თეორიას (Humorism). ამ თეორიის მიხედვით, ადამიანის ჯანმრთელობასა და განწყობას სხეულში არსებული ოთხი სითხის — სისხლის, ლორწოს, შავი ნაღვლისა და ყვითელი ნაღვლის — ბალანსი განსაზღვრავდა.
სტრასბურგის მკურნალებმა სიტუაცია ასე ახსნეს:
დიაგნოზი: მათ ჩათვალეს, რომ მოცეკვავეების ტვინში სისხლი გადახურდა და „ბუნებრივი გადახურება“ (Hot Blood) გამოიწვია.
ლოგიკა: იმდროინდელი მედიცინის წესით, დაავადების დასამარცხებლად სხეულს უნდა დახმარებოდი, რომ ზედმეტი სითხე ან ენერგია გარეთ გამოედევნა.
გადაწყვეტილება: ექიმებს სჯეროდათ, რომ თუ ხალხს ცეკვას აუკრძალავდნენ, გადახურებული სისხლი მათ ტვინს საბოლოოდ დაუწვავდა. ამიტომ, ერთადერთ გამოსავლად კრუნჩხვითი მოძრაობებით ამ „ცხელი სისხლის“ ბუნებრივი გზით გამოთავისუფლება მიიჩნიეს.
მათი თეორიით, როგორც კი სხეული მთელ ზედმეტ ენერგიას ოფლის სახით გამოდევნიდა, ეპიდემიაც მაშინვე შეწყდებოდა. სწორედ ამ მცდარმა სამედიცინო ლოგიკამ აქცია უცნაური ფსიქოლოგიური აშლილობა მასობრივ ტრაგედიად.
COPYRIGHT © EVPATORI.GE / საავტორო უფლებები დაცულია
